Bekir Çoban-zade - Tuvğan Til (Şiir; Budapest, 1918s.) | Текст песни

• Тексты песен
• Bekir Çoban-zade
• Tuvğan Til (Şiir; Budapest, 1918s.)

Seni men Qırımda, Qazanda taptım,
Cüregim qaynağan, taşqanda taptım...
Cat elde muğayıp, açınıp cürgende,
Ümütim, hayalım şay tüşip cürgende,

Moynuña sarıldım, dertimni aytıp,
Bir güzel sözüñmen ozüme qaytıp...

Cırlarıñ bolmasa, maneñ bolmasa,
''Curt'' degen sözüñmen cürek tolmasa,
Ah, nasıl curermen gurbet yaqlarda,
Tanışsız, bilişsiz yat soqaqlarda?..

Bilmiymen-türükmi, Tatarmı adıñ,
Bek yaman tatlısıñ, Tañrıdan tadıñ.

Türük de,tatar da seniñ sözleriñ,
Ekisi eki çift muñlu kozleriñ...

Viyana ogünde, Qazaq içinde
Barabar cırladıq Hindlerde, Çinde...

Añlasın bir seni , duşman da süyer,
Bir canıq sözüñmen curegi iyer...

İstiymen özüñni her yaqta körmek,
Her yerde inciñden destanlar örmek...

Quşlarğa, qaşqırğa üyretsem seni,
Sen bolsañ öksüzniñ köñülden süygeni.

Camige, mihrapqa, sarayğa kirseñ,
Deñizler, çöllerniñ çetine erseñ...

Seniñmen duşmanğa yarlıqlar yazsam,
Qaruvlı sözüñmen köñlüni qazsam...

Qabrimde melekler sorğu sorasa,
Azrail tilimni biñ kere torasa,-

''Öz tuvğan tilimde ayt mağa! '' dermen,
Öz tuvğan tilimde cırlap ölermen...

Köñlümni qayğılar kemirip turğanda,
Halqımnı tınışsız yıldızı urğanda,

Tuvğan til,-başqası aqlıma kelmiy,
Bir buyuk sırımsıñ, duşmanlar bilmiy...