Diabolus in Musica - Ahi, amours (Conon de Béthune) | Текст песни

• Тексты песен
• Diabolus in Musica
• Ahi, amours (Conon de Béthune)

Ahi! amours, con dure departie
Me convendra faire de la meillour
Qui onques fust amee ne servie!
Dex me ramaint a li par sa douçour
Si voirement que m'en part a dolour!
Las! qu'ai je dit? Ja ne m'en part je mie:
Se li cors vait servir Nostre Seignour,
Li cuers remaint du tout en sa baillie.

Diex est assis en sont saint hiretage;
Or i parra se cil le secourront
Cui il jeta de la prison ombrage
Quant il fu mors en la crois que Turc ont.
Sachiez cil sunt trop honi qui n'iront,
S'il n'ont poverte u vieillece u malage;
Et cil qui sain et joene et riche sunt
Ne pueent pas demorer sanz hontage.

Touz li clergiez et li home d'aage
Qui en aumosne et en bien fais manront
Partiront tuit a cest pelerinage
Et les dames qui chastement vivront
Et leauté portent ces qui iront;
Et s'eles font par mal conseill folage,
A recreanz et mauvais le feront,
Quar tuit li bon iront en cest voiage.

Las! je m'en vois plorant des ieus du front
La u Deus veut amender mon corage,
Et sachiez bien qu'a la meillour du mont
Penserai plus que ne faz a voiage.

Diabolus in Musica еще тексты