Diabolus in Musica - Bien me deüsse targier (Conon de Béthune) | Текст песни

• Тексты песен
• Diabolus in Musica
• Bien me deüsse targier (Conon de Béthune)

Bien me deüsse targier
De chançon faire et de mos et de chans,
Quant me convient eslongier
De la millor de totes les vaillans,
Si em puis bien faire voire vantance,
Ke je fas plus por Dieu ke nus amans,
Si en sui mout endroit l’ame joians,
Mais del cors ai et pitié et pesance.

Ne ja por nul desirier
Ne remanrai chi avoc ces tirans,
Ki sont croisiet a loier
Por dismer clers et borgois et serjans;
Plus en croisa covoitiés ke creance.
Et quant la crois n’en puet estre garans,
A teus croisiés sera Dieus mout soffrans,
Se ne s’en venge a peu de demorance.

On se doit bien efforchier
De Dieu servir, ja n’i soit li talans,
Et la char vaintre et plaissier,
Ki tos jors est de pechier desirans;
Adont voit Dieus la doble penitance.
Hé! las, se nus se doit sauver dolans,
Dont doit par droit ma mérite estre grans,
Car plus dolans ne se part nus de France.

Qui ces barons empiriés
Sert sans eür, ja n’ara tant servi
K’il lor em prenge pitiés;
Pour çou fait boin Dieu servir, ke je di
Qu’en lui n’afiert ne eür ne kaance;
Mais ki mieus sert, et mieus li est meri.
Pleüst a Dieu k’Amors fesist ausi
Ensvers tos ceaus qui ens li ont fiance.

Li Quens s’en est ja vangiés,
Des haus barons, qui or li sont faillit.
Cor les eüst anpiriés,
Qui sont plus vil que onques mais ne vi!
Dehait li bers qui est de tel sanblance
Con li oixel qui conchïet son nit!
Po en i a n’ait son renne honi,
Por tant qu’il ait sor ses homes possance.

Diabolus in Musica еще тексты