Гуру ПесенEugen Baryshnikau - Chvoji (Mazurak Kasinerski) // Live, 11.03.2009 | Текст песни
У застылай сасновай жывіцы
Промні сонца сьпяць да вясны.
Сыпле неба сівое
З далёкай касьцельнай званіцы
Жмені жалю, бы глебу на века труны.
Толькі мы больш ня чуем нічога
Дый наўкол — ані шум баравы.
Пахне хвояй абапал дарогі,
Калыхаецца лес нежывы.
Пахла порахам,
Воляй і навальніцай.
Бор гудзеў гуртам медных ствалоў.
Стрэлаў сполахі,
Кроплі барвовых суніцаў
На ігліцу цяклі са штыкоў.
Бор гудзеў растрывожаным вульлем,
Косы джалілі жыцьцяў мурог.
І зямныя маленькія кулі
Кулю велькую білі з-пад ног.
Усходні вецер з карэньнем дрэвы
Рваў, бы прызнаньне разьюшаны кат.
І хвастала па сьпінах залева,
Бор гудзеў перунамі гармат.
Але мы больш ня чуем нічога
Немата працінае прастор
Пахне хвояй абапал дарогі
Калыхаецца шыбеніц бор.
Тыя ж сосны, ды толькі бяз шатаў —
У пыл дарожны лапкі ляглі.
Тыя ж воі, ды выі сьцяты,
Карані не кранаюць зямлі.
Адзьвінелі набатам сякеры,
Косы зьвіліся вакол шый...
Душам душна ў грудзёх касінераў
Бор нямы калыхаць у цішы.
Пахне хвояй.
У застылай сасновай жывіцы
Промні сонца сьпяць да пары.
Стыне зброя.
Мы вернемся, каб не скарыцца.
Зноў і зноў
Будуць хвоі
шумець
у бары.
кастрычнік 2007
Статистика страницы на pesni.guru ▼
Просмотров сегодня: 1