Godfrey of Saint Victor - Planctus ante nescia | Текст песни

• Тексты песен
• Godfrey of Saint Victor
• Planctus ante nescia

Planctus ante nescia, planctu lassor anxia,
crucior dolore;
orbat orbem radio me Iudea filio,
gaudio, dulcore.

Fili, dulcor unice, singulare gaudium,
matrem flentem respice conferens solatium.
Pectus, mentem, lumina torquent tua vulnera,
que mater, que femina tam felix, tam misera!

Flos florum, dux morum, venie vena,
quam gravis in clavis est tibi pena.
Pro dolor, hinc color effugit oris;
hinc ruit, hinc fluit unda cruoris.

O quam sero deditus, quam cito me deseris;
o quam digne genitus, quam abiecte moreris.
O quis amor corporis tibi fecit spolia;
o quam dulcis pignoris quam amara premia.

O pia gratia sic morientis.
O zelus, o schelus invide gentis.
O fera dextera crucifigentis,
o lenis in penis mens patientis.

O verum eloquium iusti Simenonis!
Quem promisit, gladium sentio doloris.
Gemitus, suspiria lacrimeque foris
vulneris indicia sunt interioris.

Parcito proli, mors, mihi noli; tunc mihi soli
sola mederis.
Morte, beate, separer a te, dummodo, nate,
non crucieris.

Quod crimen, que scelera gens commisit effera.
Vincla, virgas, vulnera sputa, spinas, cetera
sine culpa pacitur.
Nato, queso, parcite; matrem crucifigite
aut in crucis stipite nos simul affigite!
Male solus moritur.

Reddite mestissime corpus vel examine,
ut sic minoratus crescat cruciatus
osculis, amplexibus!
Utinam sic doleam, ut dolore peream,
nam plus est dolori sine morte mori
quam perire citius.

Quid stupe, gens misera, terram se movere,
obscurari sidera, lauguidos lugere?
Solem privas lumine, quomodo luceret?
Egrum medicamine, unde convaleret?

Homicidam liberas, Iesum das supplicio,
male pacem toleras, veniet seditio.
Famis, cedis, pestium scies docta pondere
Iesum tibi mortuum Barrabamque vivere.

Gens ceca, gens flebilis, age penitentiam,
dum tibi flexibilis Iesus est ad veniam.
Quos fecisti, fontium prosint tibi flumina,
sitim sedant omnium, cuncta lavant crimina.

Flete, Sion filie, tante grate gratie;
iuvenis angustie sibi sunt delicie
pro vestris offensis.
In amplexus ruite, dum pendet in stipite;
mutuis amplexibus se parat amantibus
brachiis potensis.

In hoc solo gaudeo, quod pro vobis doleo.
Vicem, queso, reddite, matris damnum plangite!

Godfrey of Saint Victor еще тексты