Guillaume de Machaut - Aucune gent / Qui plus aimme / Fiat (M5) | Текст песни

• Тексты песен
• Guillaume de Machaut
• Aucune gent / Qui plus aimme / Fiat (M5)

Aucune gent m'ont demandé que j'ay
Que je ne chant et que je n'ay cuer gay,
Si com je sueil chanter de lié corage;
Et je leur di, certes, que je ne sçay.
Mais j'ay menti, car dedens le cuer ay
Je trop grief dueil qui onques n'assouage.
Car sans sejour ay mise ma pensée
A bonne Amour faire ce qui agrée,
Ne à nul fuer n'i pensasse folage;
Et je sçay bien que ma dame honnourée,
Que je tant criem, si m'a ma mort jurée
Par crueus cuer et par simple visage.
Car, quant je voy son gracieus viaire,
D'un dous ottroy me moustre un exemplaire
Et si me vuet tenir en son hommage,
Ce m'est avis; mais aus doleurs retraire,
J'ay ce tant pis qu'on ne me porroit faire,
Car nuls ne puet penser si grief damage
Com le refus que ses durs cuers m'envoie;
Et si l'aim plus, se Diex m'en envoit joie,
Que riens qui soit. Dont n'est ce droite rage?
Certes, oïl; mais, pour riens que je voie,
De ce peril issir je ne voudroie,
Car tous siens sui sans changement de gage,
Quant esperer me fait ma garison;
Et c'est tout cler que monsignour Yvon
Par bien servir, non pas par vasselage,
Conquist l'amour dou grant lion sauvage.

Qui plus aimme plus endure
Et plus mainne dure vie, -
Qu'amours qui est sans mesure
Assés plus le contralie, -
Que li mauvais qui n'a cure
De li, einsois met sa cure
En mal et en villonnie.
Hé! Diex, que n'ont signourie
Les dames de leur droiture,
Que ceuls qui ont la pointure
D'amours au cuer atachie
Choisissent sans mespresure!
S'einsi fust, je m'asseüre,
Tels est amés qui ne le seroit mie
Et telz haïs qui tost aroit amie.

Fiat voluntas tua.

Guillaume de Machaut еще тексты