Guillaume de Machaut - De petit po, de niant volenté (B18) | Текст песни

• Тексты песен
• Guillaume de Machaut
• De petit po, de niant volenté (B18)

De petit po, de niant volenté
De moult assés doit penre, ce m'est vis,
Chascuns amans de s'amie en bon gré.
Lasse! dolente, or voy que mes amis
Ne vuet souffisance avoir
Seur volenté, ne mon petit pouoir
Croire ne puet, eins m'a pour ce guerpi.
Onques n'ama qui pour si po haÿ.

Amours scet bien que je l'ay tant amé
Et aim encor et ameray toudis
Qu'on ne puet plus; mais mesdisans grevé
M'ont envers li, qu'en li a tant d'avis,
De bien, d'onneur, de savoir
Que mon pouoir sceüst bien concevoir.
Et nonpourquant, se s'amour pers einsi,
Onques n'ama qui pour si po haÿ.

Et s'aucuns ont vileinnement parlé
A li de moy, je les met tous au pis
Qu'onques vers li feïsse fausseté
N'envers autrui, n'il ne doit leurs faus dis
Tost croire ne li mouvoir,
Eins doit avant la verité savoir.
Et s'il les croit et me laist par tel si,
Onques n'ama qui pour si po haÿ.

Guillaume de Machaut еще тексты