Kerim Gurbannepesov - Bagtlylyk hakynda | Текст песни

• Тексты песен
• Kerim Gurbannepesov
• Bagtlylyk hakynda

Kerim Gurbannepesow
\"Bagtlylyk hakynda\" (ishchinin alypsatar gonshysyna achyk haty)

Diydin sen:
\"Işçiler nädip oňýarka
Alýanja şojagaz aýlygy bilen?..\"
Emma weli işçin günlük baylygyn,
Deňäp bilmen ýyllyk baýlygyň bilen.

Seniň puldan başga bilýän zadyň ýok.
Pikiriň-zikiriň pul, pul, ýene pul.
Bolmasa-da bizde gul diýilýän zat,
Sen gul! Haram puluň elindäki gul!

...Agaň soňky demde hyrkyldap ýatyr.
Sen onuň yzyndan gitmäge derek
Şu günki gazanan puluňy sanap,
Ekstra bilen urýarsyň börek.

Syrkaw dem sanaýar, sen pul sanaýaň.
Men bolsa gazan gapgaryp pitä,
Bugy hem gaýtmadyk jüýje çorbasyn
Seniň dertli agaň yzyndan eltýän.

Sen bolsa şo mahal sanan puluňy,
Desseläp, desseläp, daňýardyň müňden.
Emma meniň kisäm müňsizem bolsa,
Şo mahal müň esse
bagtlydym senden.

...Obadaş tanyşyň ýogaldy bir gün.
Duran-duran ýerden ylgady uly il.
Sen bolsa (\"syrkaw men, işli men...\"
diýip)
Tapyndyň özüňe müň dürli delil.

Men bolsa şol mahal egnim tabytly,
Dostuňy göterip barýardym öňden.
Şonda meniň kebzäm hasratlam bolsa,
Müň esse baýdym
hem
bagtlydym senden!

...Dileg edip geldi
garryja eneň.
Bende dilegçi hem däldir-le weli,
Düwünçekmi ýa-da atgulak üçin,
Azajyk ýetmedik bolarly puly.

Sen oňa köneje 5-lik uzatdyň,
Soň 3-lik uzatdyň (kesendek tenden!)
Men bolsa şo mahal
öz enem bilen
Müň esse baýdym
hem bagtlydym senden!

Ne roman okaýaň, ne-de bir goshgy.
Okamak deregine içýäň hem iýýäň
Bir kitap görkezsem,
saldarlap görüp,
\"Şuňa näçeräk pul aldyka?\" diýýäň.

Beýik Magtymgulynyň kitabyny hem,
Özüň däl, getirip beripdir ogluň.
Halal, haram hakda okan mahalym-
Kitaby ýyrtaýjak, ýyrtaýjak bolduň.

Dogrulyk hakyndaky ýekeje söz hem
Ýerleşip bilenok pos basan beynäş...
Men bolsa her agşam bagrymy berip
Puşkine, Pyraga, Nowaýa, Geýnä,

Bal arysy ýaly şire toplaýan
Danalaň dürdäne setirlerinden.
Şol pursat
bar öýüm, maşgalam bilen
Müň esse gurply men,
Bagtly men senden!

...Söýgüden doýanok menin gözlerim.
Seniň gözleriň bolsa doýanok zatdan
Köpügiň hasaplap uzynly gije,
Mele- gelniňi-de çykarýan ýatdan.

Men bolsa şo mahal
mele gujakda,
Her minutda iki ýaşyny ýaşap,
Uly söýgi bilen ýeten bagtymyň
Kä lebinden, käte gözünden ogşap-

Seniň puluň sany çen-çakdan çyksa,
Meniň posa sanym çykýardy çenden.
Şo mahal
özüm hem,
gelnim, öýüm hem
Müň esse baýdyk
hem
bagtlydyk senden.

...Her gije, her säher
eýmençden-eýmenç
Gara wakalary görüp düýşüňde,
Käte basyrganyp, käte gygyryp,
(Hiç zatdan gorkmasyz) juwan ýaşyňda,
Maşyn sesi çyksa, tisginip turup,
Çyrany-da ýakman,
ylgaýaň gapa!..
Biz bolsak şo mahal çagalar bilen
Gark bolup iň süýji, lezzetli uka,
Zähmetiň, Söýginiň eşretin görüp,
Nur sorup ýatyrys ertirki günden.
Müňläp nulumyz ýok. Emma müň esse
Baý biz,
arkaýyn biz,
bagtly biz senden.


Kerim Gurbannepesov еще тексты