Oswald von Wolkenstein (1377-1445) - Durch Barbarei, Arabia | Текст песни

• Тексты песен
• Oswald von Wolkenstein (1377-1445)
• Durch Barbarei, Arabia

I. Durch Barbarei, Arabia,
durch Hermani in Persia,
durch Tartari in Suria,
durch Romani in Türggia,
Ibernia,
der sprüng han ich vergessen.
Durch Reussen, Preussen, Eiffenlant,
gen Litto, Liffen, übern strant,
gen Tennmarckh, Sweden, in Prabant,
durch Flandern, Franckreich, Engelant
und Schottenland
hab ich lang nicht gemessen,
Durch Arragon, Kastilie,
Granaten und Afferen,
auss Portugal, Ispanie
bis gen dem vinstern steren,
von Profenz gen Marsilie.
In Races vor Saleren,
daselbs belaib ich an der e,
mein ellend da zu meren
vast ungeren.
Auff ainem runden kofel smal,
mit dickem wald umbfangen,
vil hoher berg und tieffe tal,
stain, stauden, stöck, snee stangen,
der sich ich tӓglich ane zal.
noch aines tüt mich pangen,
das mir der klainen kindlin schal
mein oren dick bedrangen,
hand durchgangen.

II. Wie vil mir eren ie beschach
durch fürsten, künigin gevach,
und was ich freuden ie gesach,
das püess ich als under ainem dach.
mein ungemach der hat ain langes ende.
Vil gueter witz der gieng mir not,
seit ich muess sorgen umb das prot.
dazue so wirt mir vil gedrot,
und trӧst mich niena mündlin rot.
den ich e pot, die lassen mich ellende.
Wellend ich gugg, so hindert mich
kӧstlicher ziere sinder;
der ich e pflag, dafür ich sich
neur kelber, gaiss, pӧck, rinder,
und knospot leut, swarz, hӓsselich,
vast rotzig gen dem winder,
die geben muet als sackwein, vich.
vor angst slach ich mein kinder
oft hinhinder.
Dann kumpt ir mueter zuegepraust,
zwar die begint zu schelten.
gӓb si mir aines mit der faust,
des müest ich ser entgelten.
si spricht: "wie hastu nu erzaust
die kind zu ainem zelten?"
ab irem zoren mir da graust;
doch mangel ich sein selten
scharff mit spelten.

III. Mein kurzweil die ist mangerlai,
neur eselgsang und pfawengschrai
wunscht ich mir nicht mer umb ain ai.
vast rauscht der pach in hurlahai
mein haupt entzwai, das es begint zu kranken.
Also trag ich mein aigen swӓr.
tӓglicher sorg, vil pӧser mӓr
wirt Hauenstain gar selten lӓr.
mӧcht ichs gewenden an gevӓr,
oder wer das wӓr, dem wolt ich immer danken.
Mein landesfürst der ist mir gram
von pӧser leute neide,
mein dienst die sein im widerzam, das ist mir schad und laide,
wie wol mir sust kain fürstlich stam
pei meinem gueten aide
geswechet hab, leib, er, guet nam
in seiner fürstenwaide,
kӧstlich raide.
Mein freund die hassen mich überain
an schuld, des muess ich greisen.
das klag ich aller welt gemain,
den frummen und den weisen,
darzue vil hohen fürsten rain,
die sich ir er lan preisen,
das si mich armen Wolkenstain
die wolf nicht lan erzeisen,
gar verweisen.

Oswald von Wolkenstein

Oswald von Wolkenstein (1377-1445) еще тексты