Oswald von Wolkenstein - Wer ist, die da durchleuchtet (Kl. 13) | Текст песни

• Тексты песен
• Oswald von Wolkenstein
• Wer ist, die da durchleuchtet (Kl. 13)

Wer ist, die da durchleuchtet
für aller sunnen glanz
Und ... keüklichen durchfeuchtet
uns den verdorten kranz?
Wer ist, die vor an dem raien fürt den tanz
Und dem vil zarten maien pringt seinen phlanz?
Ain edle junckfrau klar,
die zwar fürwar ain sun gebar,
der keuschlich ain ir vatter was,
mäglichen rain si des genas,
selb dreien freien unitas,
da von wir sein getrösst, erlösst
von scharpfer helle gier.

Wer kan die magt volzieren
nach adeleicher art?
auf erd kain lieber dieren
zwar nie geboren wart.
ei du traut minnikliche, keusche creatur!
dein klarheit glenzet an geteusche uber alle figur,
recht als der liecht rubein
an pein pringt schein durchsichtig vein,
sein undertan in goldes runst;
der eren van mit vollem gunst
trivallen, schallen sunder plunst
so wil ich, von der zarten warten
gnaden schier.

Wer ist die ros an doren,
do von man list und sagt,
und die den grossen zoren
all über rugke tragt,
wenn si uns an dem jungsten tage machet los
aus manigvaltiklicher klage, michel gross?
wem denn der schossen sail
an mail mit hail schon wirt zu tail
ain drumm, der hat dich, frau, erkant;
der helle phat wirt im entrant.
ei klare, ware, schildes rant,
erbrich des tiefels sper, sein ger
versetz im, junckfrau zier! — Amen.