Unknown - Утренняя Молитва Старца Сафрония | Текст песни

• Тексты песен
• Unknown
• Утренняя Молитва Старца Сафрония

Утренняя молитва старца Софрония (Сахарова)
22 августа 2015
Боже вечный, Царю Святый, Творче небу и земли, Иисусе Христе, Отца безначальнаго собезначальный Сыне, неизследованною благостию призвавый мя от небытия в жизнь сию, даровавый ми благодать крещения и Свышняго пакирождения, положивый печать Духа Твоего Святого на уды тела моего; Ты бо вложил еси в сердце мое желание взыскати Тя, Единаго истиннаго Бога, услыши и ныне молитву мою.


Ни жизни, ни света, ни радости не имам, разве Тебе, Боже. Несмь достоин воззрети на Тя, от множества грехов моих, но, якоже рекл еси учеником Твоим, яко вся елика аще воспросите в молитве, верующе, приимете и еже аще что просите во имя Мое, то сотворю, дерзая призываю Тебе: очисти мя от всякия скверны плоти и духа и научи мя како достоит молити Тя.

Благослови день сей, егоже дал еси ми, недостойному рабу Твоему, и силою благословения Твоего сподоби мя, на всякое время и во всяком месте, сердцем чистым глаголати и делати во славу Твою, с терпением, смиренномудрием и любовию, в духе мира, кротости, великодушия и премудрости, и предзрети Тя передо мною выну.

Скажи мне, Господи, путь воли Твоея, по безмерной благости Твоей, и даруй мне непорочно ходити пред Лицом Твоим. Ты, Мирный Царь, испытуяй сердца и утробы, веси ослепление мое и неведение, но и желание сердца моего зриши, и болезни и скорби души моея не скрыты пред Тобою.

Вонми убо молению моему, и Духом Твоим Святым настави мя на землю праву. Елижды аще растленная воля моя поведет мя на чуждые стези, тогда молю Тя, не щади мене, но нуждею возврати мя паки на путь святых Твоих заповедей.

Силою любве Твоея даждь ми последовати стопам Твоим аможе аще пойдеши. Сохрани мя от всякаго дела и слова душетленнаго, от всякаго движения сердца и ума моего, могущаго печалити Духа Твоего Святаго или брата моего огорчати.

Научи мя, что ми подобает глаголати и како подобает глаголати. Аще же есть воля Твоя, да умолкну, вразуми мя молчати в духе мира, никакоже оскорбляющи, ниже смущающи ближняго моего.

Законоположи мя в путех оправданий Твоих и, даже до последняго моего издыхания, не попусти ми уклонитися от света Твоих повелений, яко да будут заповеди Твои единым законом всего моего бытия: и временнаго, и вечнаго.

Ей, Творче мой благий, умилосердися о мне, падшем сооздании Твоем, ущедри мя во смирении и скорби моей, и не скрый от мене путей спасения Твоего.

О мнозем и велицем молю Тя, Боже мой, но развращения и непотребства моего не забых. Темже помилуй мя и не отвержи мене от Лица Твоего дерзновения ради моего, наипаче умножи во мне сие святое дерзновение.

И сподоби мя, сквернша паче всех человек, любити Тя, якоже заповедал еси нам: от всего сердца, от всея души, всем помышлением и всею крепостию. Всем существом моим да возлюблю Тя.

Ей, Господи царю, Духом Твоим Святым научи мя благоразсуждению и разуму. Даждь ми познати истину Твою, прежде даже не сниду во гроб. Продли дни моя в мире сем, дондеже принесу Ти плоды достойны покаяния.

Не восхити мене в преполовение дней моих, или во омрачении ума моего. Егда же благоволиши положити конец окаянному житию моему, предупреди мене, да уготовится душа моя усрести Тя.

В тот великий день, в тот страшный час, пребуди со мною, Господи, и воздаждь ми неизреченную радость спасения Твоего. От тайных моих очисти мя и от всякаго беззакония таящагося во мне, и добрый ответ даруй ми принести Тебе на Страшнем Судищи Твоем.

Ей, Господи, по велицей милости Твоей и безмерному человеколюбию Твоему, услыши молитву мою. Аминь.

Unknown еще тексты