Александръ Маточкинъ - Крещеніе княгини Ольги (Повѣсть временныхъ лѣтъ) | Текст песни

• Тексты песен
• Александръ Маточкинъ
• Крещеніе княгини Ольги (Повѣсть временныхъ лѣтъ)

В лѣто 6463 иде Ольга въ грекы. И прииде ко Царюграду. И бѣ тогда царь Костянтинъ сынъ Леоновъ. И пріиде к нему Ольга. И видѣвъ ю добру сущу зело лицемъ и смыслену. И удивися царь разуму ея. И бесѣдуя рекъ к ней: Подобна еси царьствовати въ граде семъ с нами. Она же разумѣвши рече ко царю: Азъ погана есми. Аще мя хощешь крестити, крести мя самъ. Аще ни, то не крещюся. И крести ю царь с патриярхомъ.

Просвещена бывше, радовашеся душею и тѣломъ. И поуча ю патриярхъ о вѣре. И рече ей: Благословена ты в женах руськых, яко возлюби свѣтъ, а тьму остави. Благословити тя имут сынове рустии и в послѣдний род внукъ твоихъ. И заповеда ей о церьковномъ уставе, и о молитвѣ, и о постѣ, и о милостинѣ, и о воздержание тѣла чиста. Она же поклонивши главу стояше, аки губа напояема, внимаючи учения. И поклонившеся патреярху глаголюще: Молитвами твоими, владыко, да сохранена буду от сѣти неприязнены. Бѣ же речено имя ей въ святьмъ крещении Олена, яко же и древняя царици, мати великаго Костянтина. И благослови ю патреярхъ, и отпусти ю.

И по крещении възва ю царь. И рече ей царь: Хощу тебя пояти собѣ жену. Она же рече: Како хощеши мя пояти, а крестив мя самъ и нарече мя дщерею? А въ христьянехъ того закона нѣсть, ты сам вѣси. И рече: Переклюкала мя еси, Ольго. И вдасть ей дары многы, злато и сребро, и паволоки, и съсуды различныя. И отпусти ю, и нарек ю дщерью собѣ.

Она же хотящи домовъ. И пріиде к патриярху, благословления просящи на домъ. И рече ему: Людие мои погани, и сынъ мой. Дабы меня Богъ соблюлъ от всякого зла. И рече патриярхъ: Чадо вѣрное, въ Христа крестилася еси и въ Христа облечеся, Христосъ иматъ сохранити тя. Яко же сохрани Еноха в первыя роды, и потомъ Ноя въ ковчезѣ, Авраама от Авимелеха, Лота от содомлянъ, Моисѣя от фараона, Давида от Саула, трие отрокъ от пещи, Данила от зверей, и тако и тя избавить от сѣтей его. И благослови ю патриярхъ. И иде с миромъ въ свою землю.


Александръ Маточкинъ еще тексты