Алибек Тамбиев - Артыкълыкъ | Текст песни

• Тексты песен
• Алибек Тамбиев
• Артыкълыкъ

Сёзлери Эбзеланы Абу-Юсуф хаджини, макъамы - Тамбийланы Алибекни.

Бу ёлгенни къайгъысы уллу къыйынлыкъ болду,
Адамым ёледи деб, хар ким къоркъуудан толду.

Адамы ёлюр-ёлмез, уллу къайгъы киреди,
Эт-джен къауум джыйылыб, анга азаб береди.

Ахлусу къайгъы салыб, ёлгенин унутдурад,
Миллет айыб этер деб, рысхысын къурутдурад.

Кесине оноу джетмей, ала оноу этелле,
Бу джарлыны къурутуб, къууанч этиб кетелле.

Оноу этиб къоймайла, тёрт джанындан джабышыб,
Фарызны тындыргъанча, айланалла чабышыб.

Ёлюк иесин къоймайла ауузун бери ачаргъа.
Джууукъбуз деб чабалла, рысхычыгъын чачаргъа.

Джууугъумса, этимсе, деб джыйылыб келелле,
Джау этерикни этиб, сыйдам этиб кетелле.

Сормай-ормай келирле, тюз тёрде олтурурла,
Юйюнге, кесинге да ала ие болурла.

Джашауунгу сормазла, «джокъдуну» англамазла,
Сеннге оноу къоймазла, сёзюнге тынгламазла.

Талай джылланы ауруб, дохдурлада айланса,
Кеси да тамам арыб, ёлюгю да сойланса,

Аны ызындан джюрюй, бошаса ол сомларын,
Кючден юйге джыйылса – арыб, сюйрей санларын,

Багъалы джууукъладан аны бири да кёрмез,
Инджилиб джюрюйсе деб, чыгъарыб сомун бермез.

Артында ёксюзлери къалса да, къарамазла,
Бу ёксюз хакъыды деб, харамдан рысламазла.

Разымыса, тюлмюсе анга бири къарамаз,
Алайдан бир джукъ алмай, джюреги хош къорамаз.

Сени барынг-джогъунг да къулагъына кирмейди,
Сокъур болуб бошагъанд, терсни-тюзню кёрмейди.

Миллетча этеме деб, тели ишни этеди,
Аламат этеме деб, кирге батыб кетеди.

Къарачайда джууугъунг сени джауунг болады,
Бушуу кюнюнгде келиб, ол къыйынлыкъ салады.

Джууукъмуду сора ол джунчууунгу кёрмеген,
Не бла болушайым деб, джазыкъсына келмеген?

Къалайды джашауунг деб, хапарынгы сормагъан,
Артыкълыкъ адетледен, джакъ болуб, къорумагъан.

Джау болуб, эм биринчи арбазынга ол кирген,
Халкъда джахил адетле, элден айыб – ол билген.

Динсиз болса да кърал, бир джукъджукъла береди,
Англаб, къыйын кюнюнгю, онгсузгъа эс бёледи.

Бизде уа молла къауум бир джукъну англамайла,
Къарангыдан ёлелле, айтсанг да, тынгламайла.

Бу джарлы халкъда акъыл джокъ болубму къалгъанды?
Телилик, акъылсызлыкъ тамам къолгъа алгъанды!

«Тюзлюк» деген сёзню ол бошагъанды унутуб,
Къарачай тилде аны сагъынмайла, къурутуб.

Бу хариб халкъда мыйы ишлемейми къалгъанды?
Хар неде да оноуну къатын джыйын алгъанды!

Тюзелирми сора халкъ, оноу алагъа къалса,
Билгенни ары тюртюб, джахил оноуну алса?

Нафсылары бузулгъан къауум да тоялмаса,
Динде болмагъан затны, ол англаб къоялмаса.

Аланы тойдургъунчу, хаман биз барыб турсакъ,
Къалай тюзелир миллет, къарангы джашау къурсакъ?!

Джарлы, онгсуз айырмай, барыб харам ашасакъ,
Тюзлюкню биз сан этмей, зорлукъ эте джашасакъ?!

Бу тукъум артыкълыкъгъа Уллу Аллах къарармы,
Харам джолда этилген къуллукъ джукъгъа джарармы?!

Алибек Тамбиев еще тексты