Алибек Тамбиев - Маулутну юсюнден | Текст песни

• Тексты песен
• Алибек Тамбиев
• Маулутну юсюнден

Сёзлери Эбзеланы Абу-Юсуф хаджини, макъамы - Тамбийланы Алибекни.

Уллу Аллах Къуранда, файгъамбарын уллулаб,
Аны сыйын кёрюуню былай айтады махтаб:

«Сыйлы Аллах Кеси да, Аны мёлеклери да,
Салат-салам салалла аланы хар бири да.

Эй, ийман салгъан къауум! сиз да салыгъыз анга
Салат-салам – кёкледе, джерде эм сыйлы джаннга!»-

Деб, бизни Сыйлы Аллах чакъырады сыйларгъа
Ол Кеси сюйген джаннга биз да сюйюб салыргъа.

Ол баргъан джолну тутуб барыу – аны сюймекди,
Салауат салыб джолун тутмау – ол терсеймекди.

Аны сюннетин тутуу – аны сыйын кёрюудю,
Тюз джолдан аджашмайын, ийман была ёлюудю.

Расулну керти сюйген аны джолун барлыкъды,
Аны сюннетин тутхан, шафагатын аллыкъды.

Бизникиле ашаугъа ол аятны айталла,
Салауатла да салыб, ашаб-тоюб къайталла.

Иги тойсала ала, бир хызен да алсала,
Омакъ мешнагъа миниб, патчах кибик барсала,

Озаманда саналад салауатла салгъаннга,
Муслиман динни тутуб, аны джолун баргъаннга.

Аллай динми келтирди, ол бизнича этдими,
Кесини умметине ол затны юретдими?

Хар заман бу аятны далилге келтирелле,
Аны сылтаугъа салыб, ашау-ичиу этелле.

Сейир тюлмюд ишлери къойла, малла кесмейин,
Салауат джарамаймыд, биреуню тюб этмейин?!

Аят алаймы айтад, сен биреуню тойдур да,
Сора салауатла сал малын, мюлкюн джойдур да?!

Ашау-ичиу къурмайын джарамаймыд салыргъа,
Аны сюннетин тутуб, шафагъатын алыргъа?

Огъесе ашар ючюн, сылтау керекми болад?
Динин ашаугъа буруб, башына азаб алад.

Къуран былай айтад деб, халкъны алдаб ашайла,
Ашха табыннган къауум ётюрюкню джаншайла.

Зикир этиулери да аны кибик алайды,
Тепсилени, хызенни хар бири да марайды.

Огъесе ала билген, къуру ол дин болурму?
Къарны къайгъылы адам – ол джаннетде солурму?

Рысхыгъа табыналла, аны Аллахха атаб,
Озаманда алагъа ашаргъа болад бек таб.

Уялмай къалай къурайла, ол къарыусуз сылтауну,
Аджашыб, теренине тюшгенле шайтан ауну.

Джаш къауумну бузалла, аман юлгю кёргюзюб,
Джюреклерин къачырыб, аланы динден юзюб.

Алибек Тамбиев еще тексты