Аминат Шидакова - Джигит Исламны кюйю. | Текст песни

• Тексты песен
• Аминат Шидакова
• Джигит Исламны кюйю.

Йа Аллах, сен бер насыб бла саулукъ
Хар таза джанны юйюне.
Аллах дегенле, бир тынгылагъыз
Джишит Исламны кюйюне...

Къырымшаухал улу ата элинде
Шыйых Къарт-Джуртда туугъан эд
Бабаларыча ол акъ санларын
Таза Къобанда джуугъан эд...

Онгусзгъа къарай, сакъатха джарай
Миллетге кесин сюйдюрдю...
Акъыл кючю бла ашха иши бла
Зар джюреклени кюйдюрдю...

Зар джюрекли уа къутургъан итча
Акъ иннетлини талайды
Тюзлюкню джолу къобхан къобанны
Ёрге джюзгенча алайды...

Джаныууар къанлы ол джыртхыч къауум
Сеннге тишлерин билейле,
Ит мурдарладан башынгы сакъла деб
Джуукъ, тенг да тилейле...

Таймадынг, Ислам, тутхан джолунгдан,
Тюзге - тюз, терсге - терс дединг,
Кёб къыйынлыкъны кёрген халкъынга
Сен насыб джолну излединг...

Шайтаннга къуллукъ этген эгерле
Ызынгы ызлыб турдула,
Мешнангдан чыгъыб, атлагъанлайынга
Сени сыртынгдан урдула...

Автомат тутхан зар джюрек мурдар
Тамам ышанга алгъанды
Ол юч окъ тийген таджал санларынг
Элекге ушаб къалгъанды...

Ананг джокъ сеннге сарын салыргъа,
Атанг джокъ бушуу этерге.
Нек ашыкъгъаненг, къыйынлы Ислам,
Ата-ананга кетерге...

Миллетим, джуртум деб айландынг да,
Джашау нёгер да алмадынг,
Ислам улу деб айтылыр кибик
Ызынгдан баланг къалмады...

Бушуу ауазла ёджюу этелле
Къыямат къышны джелине,
Джарлы Исламны алыб баралла
Сал этиб Къарт-Джурт элине...

Джаныча кёрген джангыз эгечинг
Сарынла салыб джылайды,
Джанындан юлюш эте тургъанча
Ариу бетинги сылайды...

Сен къобалмайса, къыйынлы Ислам,
Джанынг джол тутуб Аллахха,
Къарнашларынг а, ючюсю бирден,
Кюйюб баралла палахха...

Ким ёлтюргенин билмеймеле тюзюн,
Терсликни кимге салсынла?
Юч къарнашынгда джокъду мурдар къан,
Къанынгы къалай алсынла?

Учуб джукъланнган джарыкъ джулдузча
Джуртну джарытыб джукъландынг...
Миллетинг ючюн чаба бек арыб
Сен ёмюрлюкге джукъладынг...

Сени бек сюйген джууугъунг, тенгинг,
Кёрюнге келиб джылайла...
Шош къабырынгда ёсген хансланы
Джазгъы аязла сылайла...

Къыйынлы Ислам, таза джашадынг,
Таза да кетдинг дуниядан.
Джан деб тёрюнге чыгъар сени деб
Тилегиз Уллу Аллахдан.

Зарлыкъ тарлыкъны, джюрек кирликни
Джазгъы джангурла джуусунла,
Къарачайгъа тюзлюкню сюйген
Исламча джашла туусунла.


Аминат Шидакова еще тексты