Англо-саксонская поэма - Deor (with saxon lyre) | Текст песни

• Тексты песен
• Англо-саксонская поэма
• Deor (with saxon lyre)

Welund him be wurman wræces cunnade
Anhydig eorl earfoþa dreag,
Hæfde him to gesiþþe sorge and longaþ,
Wintercealde wræce; wean oft onfond
Siþþan hine Niðhad on nede legde,
Swoncre seonobende on syllan monn.
Þæs ofereorde, þisses swa mæg.

Beadohilde ne wæs hyre broþra deaþ,
On sefan swa sar swa hyre sylfre þing.
Þæt heo gearolice ongieten haefde
Þæt heo eacen wæs; æfre ne meahte
Þriste geþencan ha ymb þæt sceolde.
Þæs ofereorde, þisses swa mæg.

We þæt Mæðhilde mone gefrugnon
Wurdon grundlease Geates frige,
Þæt hi seo sorglufu slæp ealle binom.
Þæs ofereorde, þisses swa mæg.
Ðeodric ahte þritig wintra
Mæringa burg; þæt wæs monegum cuþ.
Þæs ofereorde, þisses swa mæg.

We geascodan Eormanrices
Wylfenne geþoht; ahte wide folc
Gotena rices. Þæt wæs grim cyning.
Sæt secg monig sorgum gebunden,
Wean on wenan, wyscte geneahhe
Þæt þæs cynerices ofercumen wære.
Þæs ofereorde, þisses swa mæg.
Siteð sorgcearig, sælum bidæled,
On sefan sweorceð, sylfum þinceð
Þæt sy endeleas earfoða dæl.

Maeg þonne geþencan, þæt geond þas woruld
Witig Dryhten wendeþ geneahhe,
Eorle monegum are gesceawað
Wislicne blæd sumum weana dæl
Þæt ic bi min sylfum secgan wille,
Þæt ic hwile wæs Heodeninga scop,
Dryhtne dyre. Me wæs Deor noma.
Ahte ic fela wintra folgað tilne,
Holdne hlaford,oþ þæt Heorrenda nu,
Leoðcræftig monn, londryht geþah
Þæt me eorla hleo aer gesealde.
Þæs ofereorde, þisses swa mæg.