Андрэй Мельнікаў - Да 475-годзьдзя Аршанскае бітвы | Текст песни

• Тексты песен
• Андрэй Мельнікаў
• Да 475-годзьдзя Аршанскае бітвы

Да 475-годзьдзя Аршанскае бітвы

На месцы Аршанскае бітвы — ральля…
Забруджана рэчка Крапіўна, дзе вораг тануў.
Па берагу рэчкі — дачы мясцовых зямлян.
Аб бойні тае зь іх ніхто і ніколі ня чуў.

Забытыя рыцары тыя, што перамаглі.
Краіна зьняверыла ў годнасьць, магутнасьць сваю.
Адзіныя чорныя птушкі на гэтай зямлі
Адзіныя песьні аб вечным адзінстве пяюць:

Колькі год марылі,
Каб прыйшлі маскалі
Зь верай, мовай сваёй і урадам!
Толькі тым і жылі,
Ў рэшце рэшт даждалі,
Дзякуй вам, дарагія браткі!

Аб бітвы Аршанскае — моўчкі. Навошта аб тым?!
Паўсталі з калень каб?! Ня трэба! Ня трэба нагод!
Заўсёды былі вы малодшыя чыйсьці браты:
Прыбіты, галотны, ушчэнт непісьменны народ.

Прымайце ахвярваньні, ды й вырабляйце тавар!
Хай гіне культура! Хай ўсюды заводы дымяць!
Хай кожны маскоўскі халуй — гэта ваш гаспадар!..
Ды толькі ці варта пра тое натхнённа сьпяваць?!

Колькі год марылі,
Каб лясы і палі
Перайшлі пад Масквы уладу!
Толькі тым і жылі,
Ў рэшце рэшт вы прыйшлі,
Дзякуй вам, дарагія браткі!

На месцы Аршанскае бітвы — ральля.
Забруджана рэчка Крапіўна, дзе вораг тануў.
Па берагу рэчкі — дачы мясцовых зямлян.
Аб бойні тае зь іх ніхто і ніколі ня чуў…

Ворша, 16—17 траўня 1989

Андрэй Мельнікаў еще тексты