Антонина Кымъытваал - Пипиӄылгын ынкъам рэӄокалгын (Сказка "Мышка и лисица") | Текст песни

• Тексты песен
• Антонина Кымъытваал
• Пипиӄылгын ынкъам рэӄокалгын (Сказка "Мышка и лисица")

Пипиӄылгын ынкъам рэӄокалгын

Эмнуӈкы гатвален пипиӄылгыӄэй. Ӄол итгъи нывакъотваӄэн пипиӄылгын пэнъёлгык ӄача, нычайпатӄэн, нэнъатчаӄэн рэӄокалгын. Рэсӄиквъи рэӄокалгын. Пипиӄылгыӄэй иквъи:
– Етти!
– Ии! – очыткогъэ рэӄокалгын. – Кита виин чайпанма мынувичвэнмык!
– Ев-ев, вынэ янот мынчаёмык!
Рэӄокалгын анӈэнайпыгъэ, энмэч чит эквэтыркын. Пипиӄылгыӄэй чеӈыттэтгъи, иӈӄун рэмкыльын рантогъа, вэтгатгъэ:
– Ытръэч-ым миӈкэмил мытрувичвэтгъэ?
– Мынпиӈӄучит!
Пэӈкочетымгогъат. Рэӄокалгын гыргоча пиӈкугъи. Уйӈэ вагъэ пипиӄылгын.
– Кита мынтэйкэвмык! – иквъи рэӄокалгын.
Рыттэлнэн риӄукэтэ пипиӄылгыӄэй. Аны ӄол ганӈэнайпылен. Юусӄыченнин рэӄокалгын гыткайпы. Елырачвыӈгъат, мэӈин армаӈ вагъэ? Лёӈвэтгата, ӄоо. Пипиӄылгын иквъи:
– Кита ынръам мынатчычет. Микынэ рэльугнин ӄол – ынӄэн рэрмэлтэтгъэ!
Ӄээӄын елырачвыӈгъат – ипэ мэӈин ы’ттъыёл ратчыгъа. Рэӄокалгын армаӈ вагъэ – ы’ттъыёл ратчыгъа.
Атчыгъэ, налгыӈойӈын-ым ӈаргыноӈӄач вагъэ. Пипиӄылгэ ӈойӈэпы йытонэн атчыльын. Ынӄо пипиӄылгыӄэй атчыгъэ. Риӄукэтэ гынонъылёӈэт ӄырирнин атчыльын, ынӄо иквъи:
– Вэлет аны ӄыӄолентогэ!
Пипиӄылгын очыткогъэ:
– Гым ӈутку!
Риӄукэтэ пэнрынэн ӄолентольын, ӄол-ым энмэч уйӈэ. Ныӄолентоӄэн атчыльын, наӄам нэмэ ынкы уйӈэ. Лымынӄо: ӈотӄэнайгым. Рэӄокалгын нэнарэрыльатӄэн, ӄынвэр пэӄэтатгъэ пэнъёлгык ӄача. Рыпэт гаелынтолен, ынӄо иквъи:
– Калырогъэ, – гыт эрмэлтэтгъи – иквъи рэӄокалгын пэпэӄылгэты.



Антонина Кымъытваал еще тексты