Влад Николаев - Чачавий | Текст песни

• Тексты песен
• Влад Николаев
• Чачавий

Таҥем, палет тыгай йомакым?
...Ик он шӱмбелжылан ойлен:
«Лӱметым, Чачавий, ом акле,
Ок келше тудо мыланем.
Колтем мый тый декет сӱаным,
Кондем оръеҥым у лӱманым.
У суртыш пурыметын акше
Лиеш вес лӱм, чевер таҥем».

Ала мурем, ала шортам мый,
Да шарнымаш йӱла сорта гай.
Ах, марий ӱдыр Чачавий,
Лӱметым мондышо ит лий!

Юл йогын гыч нӧлталте кече.
Ок шорт, ок шыргыж ӱдыръеҥ,
Чон орлык гае сӱан кечым
Вуйшӱдышым пунен вучен.
Вашка оръеҥ лийшаш кӱ серыш,
Чеверласен-вашлийме верыш,
Йоҥгалте теве корно вечын
Сӱан содом, куанле сем.

Ала мурем, ала шортам мый,
Да шарнымаш йӱла сорта гай.
Ах, марий ӱдыр Чачавий,
Лӱметым мондышо ит лий!

Марий лӱмем тылат ок келше –
Чон Чачавийын ойгырен.
Шуҥгалтын ӱдыр тура сер гыч,
Но Юмо шулдырым пуэн.
Ойган йомакын уло чынже:
Тек кажнын шкенжын лӱмжӧ лийже.
Айдемын чапше нӧлтмӧ семын
Каваш чоҥештыш ӱдыръеҥ!

Ала мурем, ала шортам мый,
Да шарнымаш йӱла сорта гай.
Ах, марий ӱдыр Чачавий,
Лӱметым мондышо ит лий!

Ала мурем, ала шортам мый,
Да шарнымаш йӱла сорта гай.
Ах, марий ӱдыр Чачавий,
Лӱметым мондышо ок лий!


Влад Николаев еще тексты