Иеромонах Василий (Мозговой) - 7-й псалом. Оптинский распев | Текст песни

• Тексты песен
• Иеромонах Василий (Мозговой)
• 7-й псалом. Оптинский распев

Гóсподи Бóже мóй, на тя́ уповáхъ, спаси́ мя от­ всѣ́хъ гоня́щихъ мя́ и избáви мя́:
да не когдá похи́титъ я́ко лéвъ дýшу мою́, не сýщу избавля́ющу, нижé спасáющу.
Гóсподи Бóже мóй, áще сотвори́хъ сié, áще éсть непрáвда въ рукý моéю,
áще воз­дáхъ воз­даю́щымъ ми́ злá, да от­падý ýбо от­ врáгъ мо­и́хъ тóщъ:
да поженéтъ ýбо врáгъ дýшу мою́, и да пости́гнетъ, и поперéтъ въ зéмлю живóтъ мóй, и слáву мою́ въ пéрсть всели́тъ.
Воскрéсни́, Гóсподи, гнѣ́вомъ тво­и́мъ, воз­неси́ся въ концáхъ врáгъ тво­и́хъ, и востáни, Гóсподи Бóже мóй, повелѣ́нiемъ, и́мже заповѣ́далъ еси́,
и сóнмъ людíй обы́детъ тя́: и о тóмъ на высотý обрати́ся.
Госпóдь сýдитъ лю́демъ: суди́ ми, Гóсподи, по прáвдѣ мо­éй и по незлóбѣ мо­éй на мя́.
Да скончáет­ся злóба грѣ́шныхъ, и испрáвиши прáведнаго, испытáяй сердцá и утрóбы, Бóже, прáведно.
Пóмощь моя́ от­ Бóга, спасáющаго прáвыя сéрдцемъ.
Бóгъ суди́тель прáведенъ, и крѣ́покъ, и долготерпѣли́въ, и не гнѣ́въ наводя́й на вся́къ дéнь.
А́ще не обратитéся, орýжiе своé очи́ститъ, лýкъ свóй напряжé, и уготóва и́,
и въ нéмъ уготóва сосýды смéртныя, стрѣ́лы своя́ сгарáемымъ содѣ́ла.
Сé, болѣ́ непрáвдою, зачáтъ болѣ́знь и роди́ беззакóнiе:
рóвъ изры́ и ископá и́, и падéтъ въ я́му, ю́же содѣ́ла.
Обрати́т­ся болѣ́знь егó на главý егó, и на вéрхъ егó непрáвда егó сни́детъ.
Исповѣ́мся Гóсподеви по прáвдѣ егó и пою́ и́мени Гóспода вы́шняго.