Кайсын Кулиев - Ана Тилим | Текст песни

• Тексты песен
• Кайсын Кулиев
• Ана Тилим

Ана тилим

Не татлыса, не татлыса, ана тилим!
Мен къыйматынгы билмесем, менден тели
Болмаз эди! Анамы сютюнлей, таза
Хар бир сёзюнг. Сен – азатлыкъны ауазы.
Дайым агъаргъан тауланы бийиклиги,
Къууанч ийген хапарны да игилиги,
Кёкде бийик жулдузланы жарыкълыгъы,
Байрам кюнде этилген той зауукълугъу,
Кёп палахда жоюлмагъан халкъ эрлиги,
Тауладан эннген череклени терклиги,
Жазгъа къууаннган къанатлыла ёнлери,
Акъ тёппелени азат баргъан желлери,
Чинар чапыракъланы шыбырдаулары,
Ахшамда жауунла шууулдагъанлары,
Учхан къанатлыланы азатлыкълары,
Сюйгенле сёзлерини татлылыкълары,
Кече къарангысы, тангны жарыкълыгъы,
Харбызла бишген чакъны да зауукълугъу,
Чегем тюзюнде атлы чабып баргъаны,
Минги тауну ёмюрледе агъаргъаны,
Бише тургъан чумланы къызаргъанлары,
Къышхы юйледе отланы жаннганлары,
Бизни къууанчыбыз, бушууубуз бары,
Бийикде баргъан къушланы ауазлары,
Сары кюз, акъ къышыбыз, жашил жазыбыз,
Бар нарт сёзюбюз, жырыбыз, жомагъыбыз
– Бары да сенде, ана тилибиз, сенде!
Аналарыбызны сыйлы, татлы тили,
Сенсиз халкъ болмаз эдик биз жер юсюнде.
Бу бийик жерибизни къууатлы тили,
Аталарыбыздан да къалгъан тилибиз!
Къартха да, жашха да тил болгъан тилибиз!
Халкъынга таймай къуллукъ этгенди кючюнг.
Сейир тюйюлдю ёлген да сени ючюн!..
Таулу тилим, ана тилим, татлы тилим,
Сен – тилегим, сен – жюрегим, жаным-тиним!
Сени къулунг болдум, анам берген тилим,
Отха атсала да, кюймей келген тилим!
Сен ёлюрсе, жокъ болурса деген кюнюм
– Бек къара кюнюмдю мени, ана тилим!
Он кере да келсин манга, келсин ёлюм,
Жаланда сен ёлме, жаша, ана тилим!
Ариу тилим, кючлю тилим, татлы тилим,
Хар халкъны да тилинлей, къууатлы тилим!..

1979