Кася Камоцкая - Над хронікай 30-х гадоў (верш Я. Янішчыц) | Текст песни

• Тексты песен
• Кася Камоцкая
• Над хронікай 30-х гадоў (верш Я. Янішчыц)

Яўгенія ЯНІШЧЫЦ
Над хронікай 30-х гадоў
------------------------------
Які разгул шалёным капытам,
А зьдзекаў жах, нібы ў сярэднявеччы!
І Д'ябал у Суддзі перапытаў:
— Таленавіты? Значыць, небясьпечны!

Ці не з жалезнай д’яблавай рукі
Пісьменьнікі запісаны ў шпіёны?!
Ужо ляцелі кнігі на шматкі
І гразьзю пакрываліся імёны.

Ужо вучоны кроў сваю глытаў,
Бяззубы ў сорак, шамкаў па-старэчы.
А Д'ябал у Суддзі перапытаў:
— Не размаўляе? Значыць, небясьпечны!

Даносчыкам да твару ліпкі бруд.
Пры дапамозе іхняе брыднечы
Выносіліся словы, як прысуд:
"Таленавіты — значыць небясьпечны…"

Паміж травы, трагічнай і груддзя,
Стаю ў журбе і думаю аб вечным:
Таленавіты — сам сабе суддзя,
А для паскуд — заўсёды небясьпечны.