Медведь - вепсская речь | Текст песни

• Тексты песен
• Медведь
• вепсская речь

Аудиозапись текста \"Медведь\" из книги Е.Б.Маркус и Ф.И.Рожанского \"Современный водский язык\"
Рассказывает Т.Ф.Прокопенко на песоцко-лужицком говоре.

Миӓ парайка паятõн, куй мӱӱ ноорõд õлиммә, мэйлӛ тулти Пэттэриссӛ кахс тӱттӧӓ вõõрõзи. Тулти вõõрõзи и - чесӓ сээ õли - и ютõлла, што \"Мӱӱ эммӛ кõнса нӓхнӱ, куй сээ сооз казвõб мурагә\". Ну, мӱӱ лӓхзиммӛ: миӓ, мину сэўкко Албина, сиз õли Лин, куцутти ни тӱттӧӓ, и нээ кахс Пэттэри тӱттӧӓ. Лӓхзиммӛ, сээ пити пӓӓлэ чӱммэнэ киломэтриа мэннӛ ялкõзи синнӛ соххо саа.
Тээтӛ мӱӱтӛ мээммӛ, а мину сэ сэўкко Албина айн ва хогõб: \"Ай, ку õллизь ӱвӓ нӓхӓ карруа!\" Миӓ юттõн: \"Паа суу чиин, \"карруа\"!\" А тӓмӓ айн ва нии пиӓб: \"Карруа õллизь ӱвӓ нӓхӓ!\" Мээммӛ коко айн, пиччӛ тээ вэд, пӓӓлэ чӱммэнэ киломэтри. Мээммӛ, тули ё сээ соо мэйлӛ васса. Мэниммӛ соххо. Нии õли сээ вари илмӛ! Мӱӱ кõйг риисузиммә, вӓхӓ ку аласси ё. А нэйлӛ Пэттэри тӱттӧйллӛ õлти нии ӱвӓд кõйг сõвад, шолковойд платд я чуутод, кõйг ӱвӓд сõвад. И мӱӱ кõйг нээ паниммә, нику вӓхӓйзэ пакко.
Сииз, лӓхзиммӛ соотә мӱӱтӛ каццома, куй сээ мурагә казвõб. Чӓйммӛ, чӓйммӛ, куулõммә, микӓ-лэ нику пуу токку. Кацоммә - сээлтӛ поолта ку тооб сээ кару! А мину сэ сэўкко нии и иссузь я мӧрнэб: \"Тан, кару!\" - \"Ну вот, сиӓ же тахтозид нӓхӓ карруа!\" Тӓмӓ ни кõвасси хӧттӱ. Тӓмӓ юттõб: \"Ой, мээммӛ ёхсõма тӓннӛ!\", нӓтэб кõйккинә тõйсõ поолõ, эб кото поолõ. Сиз миӓ юттõн: \"Митӓ мӱӱ синнӛ мээммӛ?\" Миӓ юттõн: \"Мээммӛ котто, митӓ мӱӱ синнӛ?\" Сиз юттõб: \"Мээммӛ мӱӱ кассэ рвэ вэттэ\". А кару, тайта, сээлтӛ туули сихэ рвэ вэттӛ юума. Миӓ юттõн: \"Митӓ мӱӱ мээммӛ рвэ? Сээ кару тооб юума вэттӛ, мӱӱ куй мээммӛ вэттэ, ноку сэл уппоммә?\" Сизь миӓ юттõн: \"Мээммӛ-кә мӱӱ кото поолõ!\" Мӱӱ нии кõвасси ёхзиммә! Мӱӱ кõвасси хӧттӱзиммӛ.
Сиз касэ, ку лӧввиммӛ вээл нээ сõвад! Мэjе сõвад õлти - митӓ нээ, кõйг риккинӓйзэд. А нэйлӛ тӱттӧйллӛ õлти кõвасси ӱвӓд сõвад, лӧзиммӛ и сõвад. Ни сээ чӱммэ... пӓӓлэ чӱммэ киломэтриа мӱӱ тулиммә, тайта, минуттиа виистэйшшӱмэд, вõйб õллә, поол тунниа, нӱтт эн мӓлэхтӛ, но кõвасс чиирэ. Мӱӱ нии ёхзиммә, ни õлиммә хӧттӱннӱ.
Ни миӓ сиз сэўколлә юттõн: \"Но, нӓйд нӱтт карруа?\"

Медведь еще тексты