Мухаммад-хаджи Эркенов - Къарнашым, беш намазны, кел, таны | Текст песни

• Тексты песен
• Мухаммад-хаджи Эркенов
• Къарнашым, беш намазны, кел, таны

Сёзлери МЁЧЮЛАНЫ КЯЗИМ ХАДЖИНИ (1859-1945),
макъамы Эрикгенланы Мухаммад хаджини.

Ля иляха илля Ллаху! Я Аллах!
Ля иляха илля Ллаху! Я Аллах!
Ля иляха илля Ллаху! Я Аллах!
Ля иляха илля Ллаху! Я Аллах!

Къарнашым, беш намазны, кел, таны, –
Беш намазны къылмаучуну – бил аны, –
Бетинде болмаз аны халал къаны,
Харамдан тыйылмаз аны хар саны.

Не харибди беш намазны этмеген,
Китаб айтхан къулагъына ётмеген,
Бу дунияда муратына джетмеген,
Ёле туруб, ийман бла кетмеген.

Бир сагъатны рахатланыб джашамаз,
Бар малындан, кёзю къыйыб, ашамаз,
Бу дунияны къайгъысындан бошамаз,
Этген иши шериатха ушамаз.

Ахыратын дуния малгъа ол сатар,
Джассы намаз этмегенлей ол джатар,
Узунуна джатыб джукълар, сын къатар,
Джукълай кетсе, бир заманда танг атар.

Кюн тийгинчи кие билмез кёлегин,
Къууандырыр кяфыр шайтан халегин,
Мыдах этер сууаб джазгъан мёлегин,
Ашар-ичер, тамам этер керегин.

Ашаб битсе, ныгъышлада олтурур,
Ныгъышланы фитна бла толтурур.
Аман тилин фитна сёзден тыялмаз,
Аллах къараб кёре турса уялмаз.

Аллах, кюч бер Китаб айтханны этерге,
Къыямат кюн джандетлеге кетерге.

Ля иляха илля Ллаху! Я Аллах!
Ля иляха илля Ллаху! Я Аллах!

Бу дунияда сакъ болайыкъ намазгъа,
Къыямат кюн джаханимге бармазгъа.

Бек тутайыкъ оразаны, намазны –
Къыямат кюн сен табарса хар затны.

Ойлашмасанг бу дунияны халындан,–
Кёзюнг тоймаз бу дунияны малындан.

Чархынг къоркъмаз джаханимни отундан,
Айланырса, шайтан сюрюб артынгдан.

Аллах, мени сен иймандан айырма,
Мен джарлыны – дин исламдан айырма...

Топурагъынг басар мени санымы,
Кяфырлыкъгъа къыйнаб алыр джанымы.

Атам, анам билмез анда халымы,
Къара джылан ичер анда къанымы.

Гюнахланы тар къабырда джетдирир,
Намазланы къызгъан темирде этдирир.

Хар намазын къатлаб-къатлаб тёлетир,
Ургъан сайын мен джарлыны кюл этер.

Кёрмеймисе адамланы кетгенин,
Къолларына не зат алыб элтгенин?

Муслиманла, ийман джолгъа къайтайыкъ,
Тоба этиб, «Аллах, Аллах» айтайыкъ.

Ля иляха илля Ллаху! Я Аллах!
Ля иляха илля Ллаху! Я Аллах!
Ля иляха илля Ллаху! Я Аллах!
Ля иляха илля Ллаху! Я Аллах!

Мухаммад-хаджи Эркенов еще тексты