Нанухак - Аг'наг'ак' улг'ааг'ух'тыкак' (Девушка, превратившаяся в сивуча. Сказка чаплинских эскимосов) | Текст песни

• Тексты песен
• Нанухак
• Аг'наг'ак' улг'ааг'ух'тыкак' (Девушка, превратившаяся в сивуча. Сказка чаплинских эскимосов)

Ун'ипаг'анин'ук' имани аг'наг'ак' угиныг'мын' их'саталг'ии. Ынн'аталъ ан'айук'иита аанх'утак'сак'ан'ат.
-Аа-ам, тааўа ысх'аг'амкын! Аанин'ам!

Атаасимын' к'аванг'ата лъаг'анхўааанак'ылг'иит йугыт. Упупын' илан'а йугым угиксак'унигу лъааг'анхўа илан'анын' пийаг'аат лыган атаасимын' к'аванг'ата пиик'ылг'ии:
-Аа-ам, аанин'ам! Тааўа ысх'аг'амкын!

К'ынўат нунах'лъак к'амахсимакан'а. Таахкын к'амахсагу пиит:
-Аа-а, упупын' унитылътыху. К'аагна кылгуулътыху.

Амынам ан'йак' тамах'аа кылгуг'аат кылгуг'аат. Апыг'ииг'аат. Йатах'к'ылъутын' аг'улак'ут ан'йат талъимат. Амынам к'ымалън'ук' ыснамун атх'аг'луни аг'наг'ак' илагаатмын' аанк'усалг'иими:
-Ан'йат уныхкух'сии-ии, ан'йат уныхкух'сии-ии, налих'пысии-ии к'аакык'ах'лъитн'а!
-Ынн'аталъ йугусин тыспикани йугусин'акын. Акитукиткигу!

Ага аг'улак'ут. Илан'и кылъатах'тут. Ииўын кытак'ут пилатах'тук':
-Ан'йат уныхкух'сии-ии, ан'йат уныхкух'сии-ии, налих'пысии-ии к'аакык'ах'лъитн'а!
-Ынн'ааталъ йугусин тыспикани йугусин'акын. Акитукиткигу!

Ага аг'улак'ут. илан'и пин'айии кытут. Ииўын кытак'ут аг'наг'ак' илагаг'ак'ылг'ии:
-Ан'йат уныхкух'сии-ии, ан'йат уныхкух'сии-ии, налих'пысии-ии к'аакык'ах'лъитн'а!
-Ынн'ааталъ йугусин тыспикани йугусин'акын. Акитукиткигу!

Ага аг'улак'ут. Ыстамагныг'и ага кытак'ут. Ииўын кытак'ут илагаг'латаамалг'ии:
-Ан'йат уныхкух'сии-ии, ан'йат уныхкух'сии-ии, налих'пысии-ии к'аакык'ах'лъитн'а!
-Ынн'ааталъ йугусин тыспикани йугусин'акын. Акитукиткигу!

Ага аг'улак'ут. Талъимагныг'и ага кытак'ут. Илагаатмын' алъа аанк'улъаатах'тук':
-Ан'йат уныхкух'сии-ии, ан'йат уныхкух'сии-ии, налих'пысии-ии к'аакык'ах'лъитн'а!
-Ынн'ааталъ йугусин тыспикани йугусин'акын. Акитукиткигу!

Ага аг'улак'ут. Ииўын улг'ааг'ух'лъуни к'ытхыг'нак'ак'ук'. Ан'айук'ита пиит:
-Тагии-тагии-тагии, паникамкын, тагии-тагии-тагии!

К'ытхыг'йалг'иими ан'йак' тамах'аг'ми ага увых'тук'. Ылън'а масиису улг'ааг'ух'сималг'ии. Тааўан'ук' улг'ааг'ух'тыпигыснаамалг'ии.
Тфаай! К'амахтук'.