Отарланы Омар - Анам - Билмегенлей кёчюрюрге ( Омар Отаров ) | Текст песни

• Тексты песен
• Отарланы Омар
• Анам - Билмегенлей кёчюрюрге ( Омар Отаров )

музыка и стихи Исмаила Семенова (Джырчы Сымайыла)

Билмегенлей кёчюрюрге бардыла,
Сормагъанлай машинагъа салдыла,
Эки джашынг эки джерде къалдыла
Ай джулдуз атлы, балдан татлы, ой анам!

Кимле чачдыла Семенлада къалангы,
Кимге айтайым джюрегимде джарамы,
Къайда къойдум акъ сют берген анамы?
Ай джулдуз атлы, балдан татлы, ой анам!

Тыш къангасы Кырайлагъа сатылгъан,
Баш канжалы тау артына аугъанды,
Юйюбюзге бушуу, къайгъы джаугъанды,
Ай джулдуз атлы, балдан татлы, ой анам!

Ата деген ахшы ишге талпытхан,
Ана деген кёкню джерни танытхан,
Ёлюм деген хар джюрекни ачытхан,
Ай джулдуз атлы, болдан татлы, ой анам!

Ата деген джашауунгу бачхычы,
Ана деген джашауунгу ачхычы,
Ёлюм деген джашагъанны ачысы,
Ай джулдуз атлы, балдан татлы, ой анам!

Къулагъыма сууукъ салах тартылды,
Джулдуз ананг ёлгенди деб, айтылды,
Джюрегиме джюрек ауруу къатылды...
Ай джулдуз атлы, балдан татлы, ой анам!

Атам эсе Бейтуллахда ёлюпдю,
Анам эсе, бир мусафир шейитди,
Нек джилайма кимден да не келликди?
Ай джулдуз атлы, балдан татлы, ой анам!

Ой, Къарачай къуш тюгюнлей чачылдынг,
Къыйынлыкъны эшиклери ачылды,
Джарлы миллет Азиягъа атылды,
Ай джулдуз атлы, балдан татлы, ой анам!

Къарачайда къабырынгы мен табсам,
Азиягъа Зияратха бармаз эм,
Былай болуруму тамам мен билсем,
Ай джан бермейин айырылып къалмаз эм.

Бу дуниягъа туумай къалгъан мен болсам
Сени ёлген ачыуунгу билмез эм,
Къазах элде къабырынгы кёрмез эм...
Ай джулдуз атлы, балдан татлы, ой анам!

Ёге деген аз сюйюлген бош кибик,
Ёксюз деген къанаты сыннган къуш кибик.
Сенсиз джашау бастырыкъланнган тюш кибик,
Ай джулдуз атлы, балдан татлы, ой анам!

Кёр узакъды, тура-тура безерсе,
Уллу Аллахны буйругъуна тёзерсе,
Махшар кюнде, ой балам деп, излерсе,
Ай джулдуз атлы, балдан татлы, ой анам!

Кюн садакъа мени сенге беририм,
Аллах айтса, махшар кюндю кёрюрюм,
Къазах элде къалды, харип, ёлюгюнг
Ай джулдуз атлы, балдан татлы, ой анам!

Эрттен, ингир дуа эте келейим,
Сууаплыгъын аны сенге берейим,
Джаннет кёр да, уста джарыкъ кёрейим,
Ай джулдуз атлы, балдан татлы, ой анам!

Отарланы Омар еще тексты