Отарланы Омар - Мараучуну хапары ( Омар Отаров ) | Текст песни

• Тексты песен
• Отарланы Омар
• Мараучуну хапары ( Омар Отаров )

Апсатыды тогъай башлы танакёз.
Сюрюулерин терс жоллагъа жибермез.
Аны барды, учхан къушлай, мюйюзю,
Тар къоллада, чууанлада - кириши.

Тау башлары, ойра, болур, чууана,
Мараучу уа келе болур, къууана.
Аркъасында, ойра, аны къауалы,
Апсатыгъа болур былай жууабы:

- Апсатыны бери кюню сют кибик,
Бермез кюню болур аны ит кибик,
Берир болсанг, тар къошунда улутма,
Бериучюнгю, ойра, бийим, унутма.

Тар къошунну айры башын кенг этгин,
Ырысхыны, ойра, мында кёп этгин.
Сени малынг - къолда толан агъачлай,
Къойма, тейри, сабийлени сен ачлай.

Сабийлени ачлай къойгъан сен болсанг,
Ким аурутур жарлылагъа, ойра, жан?
Къауалымы жауу болур балаууз,
Кийиклени болма къойчу къанаууз.

Жарлы уучу алгъыш эте атланыр,
Танг алада къауалына къапланыр.
Апсатыны къулакълары тик турур,
Ойра, кесин халал, чомарт сундурур.

Ол уучуну элтип барыр бийикге,
Буйрукъ этер жугъутургъа, кийикге.
- Жалай-жалай, жалаулагъа чыгъайыкъ,
Уучуладан тасха - таша бугъайыкъ.

Уучуладан тасха - таша турмасакъ,
Биз аланы терс жоллагъа бурмасакъ,
Ала бизни марап, къуууп тутарла,
Жаш кийикле къан хурттакла жутарла.

Жалаулада Апсатыдан батыр жокъ,
Анга ышаннган уучулада акъыл жокъ.
Апсатыны кёзю болур жютюлю,
Жарлы уучу келмез жолгъа тюртюлюр.

Апсатыны сёзю болур буйрукълу,
Таналары тарда алтын къуйрукьлу.
Апсатыны къызы болур Гошала,
Жугъутургъа къысыр эчки къошалла.

Бирси къызы болур аны Жансюер,
Жугъугурну къолтугъундан къан сиер.
Жугъутурну къолтугъундан къан сиер,
Жарлыгъа бергенни, ойра, жан сюер.

Апсатыны жашы болур Ындырбай,
Шапаланы жюн тюбюнде тындыргъан.
Ындырбайны барды марал къошлары,
Эгиз табар, жугъутургъа къошланыр.

Илишаннга эки марал тутулмаз,
Ындырбайдан (...) улакъ къутулмаз.
Апсатыны жашы болсун къууатлы,
Къызы болсун тауда эгиз улакълы.

Жарлы уучу таугъа чыгъып къарады,
Кийиклени бирем-бирем санады.
Улакълары ташдан ташха секире,
Жугъутурла къара къанла кекире.

Жугъутурну бирден сора тиши жокъ,
Аллах берсе Апсатыны иши жокъ,
Биз барабыз эрттенликде атыугъа,
Керекдиле буу мюйюзле сатыугъа.

Керекдиле бизге малла къурманнга,
Жугъутурну башын атдым туманнга.
Жарлы уучу алай айтып олтурду,
Акъ башлыгъын жёрмеледен толтурду.