Отарланы Омар - Сосурукъну жыры ( Омар Отаров ) | Текст песни

• Тексты песен
• Отарланы Омар
• Сосурукъну жыры ( Омар Отаров )

Нарт батырла жортуулгъа чыкъгъандыла,
Атланы оруп алгъа ашыкъгъандыла.
Нарт Ёрюзмекди башчылары, башлары,
Сосурукъду бек гичилери, жашлары.

Орира орира ой, орира орира ой!

Нарт уядан чыгъып узакъ кетгендиле,
Кёп тауладан, кёп къолладан ётгендиле.
Бара кетип Нарсанагъа жетгиндиле,
Алайда тохтаргъа оноу этгендиле.

Орира орира ой, орира орира ой!

Нартсанада атланы санагъандыла,
Къарыуларын, кючлерин сынагъандыла.
Тёгерекде баргъа, жокъгъа къарайдыла,
Кийиклени бууланы да марайдыла.

Орира орира ой, орира орира ой!

От тиргизирге от тапмай къалгъандыла,
От излерге сен бар, мен бар болгъандыла.
Сосурукъ: "Мен барайым!"- дегенди, отха,
"Гичи барыргъа керекди аллай затха!"

Орира орира ой, орира орира ой!

Алай айтып миннгенди секирип атха,
Барыда ыспас этгендиле жаш нартха.
Сосурукъ атха къамчини жетдиргенди,
Къушча учуп, тау ауузлагъа киргенди.

Орира орира ой, орира орира ой!

Чаба, жорта ол таудан таугъа ётгенди,
От жарыкъ чыкъгъан бир дорбуннга жетгениди.
Къараса, дорбунда уллу от жанады,
Отну жанында деу эмеген жатады.

Орира орира ой, орира орира ой!

Сермеп алды Сосурукъ отдан кесеуню,
Кёзюне мыдых тюшюп уятды деуню.
Ол заманда, нарт адетде Салам берди,
Нек келгенин деуге ангылатып кёрдю.

Орира орира ой, орира орира ой!

Унамайды эмеген отну берирге,
Излейди ол къарыу, кюч сынап кёрюрге,
Жаш болса да, Сосурукъ устады амалгъа,
Деуге ойюн юйретейим, деди алгъа.

Орира орира ой, орира орира ой!

Ол анга къызгъан темирлени жутдурду,
Тёппеси бла къая ташланы тутдурду.
Кесини ким болгъанын андан букъдурду,
Деу эмегенни отун алып къутулду!

Отарланы Омар еще тексты