Отарланы Омар - Таппасхан улу Акъболат ( Омар Отаров ) | Текст песни

• Тексты песен
• Отарланы Омар
• Таппасхан улу Акъболат ( Омар Отаров )

Ойт-ойт, жаным, кече ортада, жаным, Уллу Чегемге
Ачы къуугъун келгенди, дей, ойт-ойт, жаным, келгенди.
Ой, биягъы Туудуланы малларын жау сюргенди,
Аман жау а сюргенди, дей, ойт-ойт, жаным, сюргенди.

Абсалтыдан, ойт-ойт, жаным, ачы къуугъун къычырды:
- Ойт-ойт, маржа, эр жигитле, туругъуз, ой, туругъуз!
Атланалгъан - сауут алып, сауут алып чыгъыгъыз!
Гара Аузуна, Мёлюшхюге барыгъыз, ой, барыгъыз!

Атланнганда, алгъа болду Таппасхан улу Акъболат,
Секириб'а тор атына миннгенди, дей, миннгенди!
Ойт-ойт, жаным, таулу ушкогун онг къолуна алгъанды,
Жауну, къачмай, кёп турмазын билгенди, дей, билгенди!

Гара Аузунда Жетегейлени уа, дейди, санайды,
Ол Мёлюшхю тауундан а къарайды, ой, къарайды.
Чыпчыкъча да жырлай-жырлай баргъанды, хей, баргъанды,
Таппасхан улу Акъболат, хей, Таппасхан улу Акъболат!

Ой, Мёлюшхю тарына да танг жарыгъы къакъгъанды, -
Терлеген тор атын нарат терекге да такъгъанды,
Ыстауатда, киши кёрмей, ары-бери чапханды,
Чапханды, дей, киши кёрмей, ары-бери чапханды.

Чаба-ёрлей баргъанды да, жауланы да кёргенди,
Чаба-ёрлей баргъанды да, сюрюуню да тапханды,
Таулу ушкокга къулакъ отну салгъанды да - бергенди,
Илишаннга жауну марап атханды, ой, атханды!

Таулу ушкок чарламайын атылды, ой, атылды,
Жау къонакъны къаны, дейди, буз чыраннга чачылды.
Мёлюшхюню туманы да танг бла тенг ачылды,
Мёлюшхюню жюреги да танг бла тенг ачыды.

Анасына жигит туугьан Таппасхан улу Акъболат
Жау жыйынны тёгерекге чачханды, дей, чачханды,
Сау къалгъаны Тау Артына къачханды, ой, къачханды
Жауну артха сюрген а, дей, - Таппасхан улу Акъболат.

Акъболат а уруш этди, бешеуленнге баз болуп,
Жау жыйыны къачханды, дей, Мёлюшхюде аз болуп,
Окъ тийгенди Акъболатны жыягъындан, тишинден.
Ай, машалла-баракалла болсун этген ишине!

Эки жауну ёлюсю да буз чыранда жатады,
Акъболат да таулу ушкокну кирпик къакъмай атады.
Ой, сюрюу да эки буз чырандан Туудулагъа къайтады,
Кязим да бу эски жырны айтады да айтады.

Ёлюклени келтиртди балас чанагъа салдырып,
Акъболат да къайтды тишин Мёлюшхеде алдырып.
Туудуланы къойлары да ыстауатха келдиле,
Чегем эл да Акъболатха ыспас-махтау бердиле!

Ойт-ойт, жаным, Акъболатха ыспас-махтау бердиле!