Средневековая музыка Европы - 21 - Es fuegt sich | Текст песни

• Тексты песен
• Средневековая музыка Европы
• 21 - Es fuegt sich

ES fügt ſich do ich was uon zehen jaren alt/
ich wolt beſehen wie die werlt wer geſtalt/
mit ellend armüt mangen winkel haiſs und kalt/
hab ich gebawt bey criſten kriechen haiden/
Drey pfenning jndem peutel und ein ſtücklin brot/
das was von haim mein zerung do ich loff jn not/
uon fremden freunden ſo hab ich manchen tropffen rot/
gelazzen ſeyder das ich wand uerſchaiden/

Jch loff ze füſs/ mit ſwerer büſs/ bys das mir ſtarb/
mein uatter zwar/ wol viertzen jar/ nye roſs erwarb/
wan eines roupt ſtal/ ich halbs zu mal/ mit ualber varb/
und des geleich ſchied ich da von mit laide/
Zwar renner koch/ ſo was ich doch/ und marſtaller/
auch an dem rüder/ zoch ich zu mir/ das war ſwër/
in kandia/ und anderswo/ ouch widerhar/
uil manchen kittel was mein beſtes klaide/

GEn preuſſen littwan tartarey türkey über mer/
gen frankreich lampart yspanien mit zwayen kunges her/
traibmich die mynn auf meines aigen geldes wer/
Ruprecht Sigmund bayd mit des adlers ſtreiffen/
Frantzoiſch möriſch katloniſch und kaſtilian/
teutzſch latein windiſch lampertiſch reuſchiſch und roman/
die zehen ſprach hab ich gebraucht wenn mir zerran/
auch kund ich fidlen trumen paugken pfeiffen/

MEin tümes leben wolt ich verkeren das iſt war/
und ward ein halber beghart wol zway gancze jar/
mit andacht was der anfangk ſicherlichen zwar/
hett mir die mynn das ende nicht erſtöret/
Die weyl ich rait und ſüchet ritterliche ſpil/
und dient zu willen ain' frowen des ich hil/
die wolt mein nye genaden ein' nuſſen vil/
bys das ein kutten meinen leib bedoret/

ICh han gelebt wol vierczig jar leicht mynner zway/
mit toben wüten tichten ſingen mangerlay/
es wër wol zeit das ich meins aigen kindes geſchray/
elichen hört jnainer wiegen gellen/
So kan ich der uergeſſen nymm' ewiklich/
die mir hat geben müt uff diſem ertereich/
jnaller werlt kund ich nicht finden jren gleich/
auch fürcht ich ſer elicher weibe bellen/

In vrtail rat/ uil weyſer hat/ geſchäczet mich/
dem ich geuallen/ han mit ſchallen/ liederlich/
jch Wolkenſtein/ leb ſicher klain/ u'nünfftiklich/
das ich der werlt alſo lang beginn zu hellen/
Vnd wol bekenn/ ich wais nicht wenn/ ich ſterben ſol/
das mir nicht ſcheiner/ uolgt wann meiner/ berche zol/
het ich dann got/ zu ſeim gebott/ gedienet wol/
ſo forcht ich klain dort haiſſer flamme wellen –


Средневековая музыка Европы еще тексты