Сяргей Балахонаў - Усе бабы, як бабы. А ты… | Текст песни

• Тексты песен
• Сяргей Балахонаў
• Усе бабы, як бабы. А ты…

УСЕ БАБЫ, ЯК БАБЫ. А ТЫ…
Усе бабы, як бабы. А ты – Одры Хепбёрн.
З іранічнай усмешкай і гатоўнасцю ўзняць пісталет.
Я сядзеў і глядзеў, як пячэцца твой хлеб. Шторм
пачынаўся на ўзмежжы ціхіх мар і мастоў праз залеў
непралазныя нетры з вады гаманлівай,
што то снегам бывала, то краляй пасудзін пустых.
Ты ж ішла праз двары, праз зялёныя нівы,
пераспелай Еўропе не давала ў маркоце застыць.
Не цябе я чакаў на вятрах і іголках.
Я чакаў пэўных вуснаў. Космаў пэўных чакаў аксаміт.
І была рэчаіснасць халоднай і колкай.
І крылатых гусараў гуфы рушылі між пірамід,
каб урэшце прыйсці да цябе і шарады
Рыму Пятага жвава разгадаць і трымаць пры сабе.
Ты мой компас цяпер. Ты мая паны-рада.
Мой навостраны нож. Мой недакончаны аўтапрабег.
Я гляджу на твае геніяльныя вейкі.
Я лаўлю на заходзе смех наіўны твой фібрамі сноў.
Іншым разам пяеш для нахабы Сяргейкі.
Але гэта чужое і пустое, як Пецька, кіно.
Твой праспект у агнях. У гірляндах мой хутар.
Вараць ліпавы мёд сто закапаных у жвір мудрацоў.
Ты ў дарозе на фронт. Я выкошваю руту.
Шакаладавы заяц папівае на шчасце піўцо.

4-5 ліпеня 2013 г.

Скарыстаны мінус So Above So Below "Remembrance of Things Past" (2013) з сайта вольнай музыкі: http://www.jamendo.com

Сяргей Балахонаў еще тексты