Хор Московского Сретенского монастыря - Покров. Стихиры на Господи воззвах | Текст песни

• Тексты песен
• Хор Московского Сретенского монастыря
• Покров. Стихиры на Господи воззвах

Стихиры на Господи воззвах

глас 1. Подобен: О дивное чудо!

Стих: Из глубины воззвах к Тебе, Господи,/ Господи, услыши глас мой.

О великое заступление печальным еси, Богородице Чистая, скорая помощнице, спасение мира и утверждение, милости пучина, Божия мудрости источниче, миру покров, воспоем, вернии, светлый омофор Ея хваляще неизреченно: обрадованная радуйся, с Тобою Господь, подаяй миру Тобою велию милость.

Стих: Да будут уши Твои/ внемлюще гласу моления моего.

О великое заступление печальным еси, Богородице Чистая, скорая помощнице, спасение мира и утверждение, милости пучина, Божия мудрости источниче, миру покров, воспоем, вернии, светлый омофор Ея хваляще неизреченно: обрадованная радуйся, с Тобою Господь, подаяй миру Тобою велию милость.

Стих: Аще беззакония назриши, Господи, Господи, кто постоит,/ яко у Тебе очищение есть.

Дивный прорече Исаиа: будет бо, рече, в последняя дни яве гора Господня, и дом Господень верху горы, увидехом же, Владычице, о Тебе истинное сбытие, горы бо и холми украсишася многоименитыми церквами Твоих праздников. Тем весело вопием Ти: обрадованная радуйся, с Тобою Господь, подаяй миру Тобою велию милость.

Стих: Имене ради Твоего потерпех Тя, Господи, потерпе душа моя в слово Твое,/ упова душа моя на Господа.

О чудное украшение всем верным еси! Пророческое истинное сбытие, апостолом слава, и мучеником удобрение: девству похвала, и всему миру предивный покров: покрый, Владычице, омофором милости Твоея императора и вся люди, вопиющия: обрадованная радуйся, с Тобою Господь, подаяй миру Тобою велию милость.

глас 4: Подобен: Яко добля:

Стих: От стражи утренния до нощи, от стражи утренния,/ да уповает Израиль на Господа.

Яко богонасажденный рай, и место животнаго древа, напаяемо Духом Святым, Тебе, Богородице, сведуще, Творца всех рождшую, животным хлебом верныя питающа. Емуже о нас со Предтечею молися, честным омофором покрывающи императора и люди от всякия напасти.

Стих: Яко у Господа милость, и многое у Него избавление,/ и Той избавит Израиля от всех беззаконий его.

Яко богонасажденный рай, и место животнаго древа, напаяемо Духом Святым, Тебе, Богородице, сведуще, Творца всех рождшую, животным хлебом верныя питающа. Емуже о нас со Предтечею молися, честным омофором покрывающи императора и люди от всякия напасти.

Стих: Хвалите Господа, вси языцы,/ похвалите Его, вси людие.

Освящается небо и земля, Церковь же светится, и людие вси веселятся: се бо Мати Божия, со ангельскими воинствы, с Предтечею и Богословом, с пророки же и апостолы, невидимо вшедши, за христианы молится Христу, помиловати град и люди, славящия Тоя Покрова праздник.

Стих: Яко утвердися милость Его на нас,/ и Истина Господня пребывает вовек.

Доброту Тя Иаковлю, и лествицу небесную, по нейже Господь сниде на землю: тех же тогда образи Твою честь и славу, Богородице, проявляху, Тя рождшую Бога всех блажат небеснии ангели, и земнии человецы, яко за весь мир молишися, покрывающи милостию, Твой честный совершающих праздник.

Хор Московского Сретенского монастыря еще тексты