Хурзарин - Сидзаргас / Мать сирот | Текст песни

• Тексты песен
• Хурзарин
• Сидзаргас / Мать сирот

Pesni.guru - сайт для Гуру

ХЕТÆГКАТЫ КЪОСТА
ИРОН ФÆНДЫР
Сидзаргас / Мать сирот

Халон баргъæвст сындзыл.
Уад тымыгъ хæссы...
Сау айнæджы рындзыл
Нарыхъæу хуыссы...

Даргъ æхсæв фыдбонæй
Цардудæн хуыздæр...
Рухс цæуы кæронæй, –
Бадынц ма кæмдæр.

Ма дис кæ йæ бадтыл! –
Цуайнаджы уæлхъус
Архайы йæ артыл
Иу саударæг ус.

Припев:
▬▬▬▬▬▬▬▬▬▬
Артдзæсты кæрæтты,
Фæныкмæ æнгом
Бадынц сывæллæттæ, –
Чи бæгънæг, чи гом...

– Ма кæут, мæ хуртæ, –
Дзуры цæм сæ мад, –
Афыцой хъæдуртæ...
Абадут æнцад!..
▬▬▬▬▬▬▬▬▬▬
Митæйдзаг æхсæлы
Мары фæздæгæй...
Цæстысыг ызгъæлы
Агмæ сусæгæй...

Хъуырмæ схæддзæ хъарæг:
“Дудгæ фæбада
Зæйы бын нæ дарæг,
Мах чи фæсайдта!..

Буц хъæбул дæм дзуры, –
Сфæлмæцыд йæ мад, –
Махæн дæр дæ цуры
Сцæттæ кæ бынат!”

Припев:
▬▬▬▬▬▬▬▬▬▬
Артдзæсты кæрæтты,
Фæныкмæ æнгом
Бадынц сывæллæттæ, –
Чи бæгънæг, чи гом...

– Ма кæут, мæ хуртæ, –
Дзуры цæм сæ мад, –
Афыцой хъæдуртæ...
Абадут æнцад!..
▬▬▬▬▬▬▬▬▬▬
Бафæллад кæуынæй
Бинонты кæстæр, –
Къонайыл æрфынæй
Адæмы хуыздæр!

– О. гытци кæд уыдзæн?
Райс–ма, цæй, дæ аг!..
– Абадут!.. Фæуыдзæн
Алкæй дæр йæ фаг...

Аг кæлы йæ былтæй, –
“Хъæдуртæ” фыцынц...
Алы ран тымбылтæй
Сидзæртæ хуыссынц...