Mikaelo Povorin - Porketo sur pargeto | Текст песни

• Тексты песен
• Mikaelo Povorin
• Porketo sur pargeto

Porketo sur pargeto

Muziko kaj vortoj de Mikaelo Povorin

Mi malkaŝu malgrandan sekreton:
Mi hodiaŭ renkontis porketon.
Sur pargeto ĝi vigle paŝadis.
La svingadon de l’ vost’, la svingadon de l’ vost’
Ĉiuj knaboj kaj inoj tre ŝatis.

(La 4-an kaj 5-an versojn de ĉiu strofo
ripetu dufoje, krom la finaĵo.)

Mi rakontu alian aferon:
La porket’ partoprenis APEROn.
Kaj ĝi estis ĉi tie ne sola:
Tuta grego da porkoj de ĉiu kolor’
Estis en kompanio petola.

Jen ankoraŭ malgranda sekreto:
Ĝi ne estis vivanta porketo.
Estis ĝi nur ludilo tre ĉarma.
Dank’ al tiu ludil’, dank’ al tiu ludil’
Kompani’ kolektiĝis tre varma.

Jen sekret’, kiun ĉiuj komprenis:
Al APER’ ne memstare ĝi venis.
Ĝin alportis al ni Uragano,
Uragan’ Forta Man’, Uragan Forta Man’,
Uragano, sed ne huligano.

Jen la lasta sekret’: Uragano
Estas nomo de samideano,
Eĉ ne nomo, sed, certe, kromnomo.
Kaj sen lia porket’ ne aperus kantet’.
Diru dankon ni al tiu homo!

Finaĵo:

Dankon, dankon, kara Uragan’!
Dankon, dankon, kara Uragan’!
Dankon, dankon, kara Uragan’,
Uragano Forta Man’!

21.02.2015, ripozejo “Jerŝovo”

Mikaelo Povorin еще тексты